काठमाडौँ — नेपाली कांग्रेसका महामन्त्री तथा स्थानीय तह उपनिर्वाचन समितिका संयोजक विश्वप्रकाश शर्माले स्थानीय तहको उपनिर्वाचनमा नेपाली कांग्रेसले एक्लै लडेर जितेको स्थानलाई उत्साहवर्धक संकेतका रूपमा लिएको बताएका छन्।
मंगलबार विज्ञप्ति जारी गर्दै महामन्त्री शर्माले उपनिर्वाचनकाे नतिजाले सन्तोषजनक एवं उत्साहवर्धक संकेत गरेकाे बताएका छन्।
‘उपनिर्वाचनमा मतदाताले व्यक्त गरेको मत मार्फत प्राप्त सन्देशको विश्लेषण र समग्र समीक्षा हामी गर्नेछौं नै, प्रारम्भिक समीक्षामा एक्लै लडेर प्राप्त स्थानलाई हामीले सन्तोषजनक एवं उत्साहवर्धक संकेतका रूपमा लिएका छौं,’ महामन्त्री शर्मा द्वारा जारी विज्ञप्तिमा भनिएकाे छ।
शर्माले उपनिर्वाचनमा मतदाताको व्यापक सहभागिताले लोकतान्त्रिक प्रणालीप्रति नागरिकको समर्थन र ऐक्यबद्धता फेरि एक पटक बलियो रूपमा प्रदर्शित भएको भएको उल्लेख गरेका छन्।
मुख्य दलहरूप्रति मतदाताले प्रकट गरेको समर्थनलाई विद्यमान प्रणाली मार्फत प्रगतिको दिशामा प्राप्त ऐक्यबद्धताका रूपमा लिएर तिनै तहका सरकारले काममा गति बढाउँदै नागरिक विश्वास अझ बलियो बनाउन जरुरी रहेको महामन्त्री शर्माले बताए।
‘रिक्त ४४ मध्ये १९ स्थानमा नेपाली कांग्रेसका उम्मेदवार विजयी भए। समग्रमा यो ४३.१८ प्रतिशत हो। ०७९ मा गठबन्धन गरेर चुनाव लड्दा प्राप्त स्थान भन्दा एक्लै लडेर प्राप्त स्थान संख्यात्मक कम तर राजनैतिक, सांगठनिक र गुणात्मक रूपले बढी महत्तवपूर्ण छ,’ विज्ञप्तिमा भनिएको छ।
०७९ मा विजय पाएको केही स्थान गुमाएको भए पनि त्यसबेला अन्य दलले जितेका केही स्थानमा विजय हासिल गरेको शर्माको भनाई छ। उनले भनेका छन्- ‘लोकतन्त्रमा शतप्रतिशत स्थानमा जितको अपेक्षा लोकतान्त्रिक सोच हुन्न, तर जित र हार व्यहोरेका सबै स्थानको कारण र प्रवृत्तिको वस्तुगत समीक्षा आगामी चुनावी रणनीति निर्माणका लागि महत्तवपूर्ण रहने निष्कर्ष निकालेका छौं।’
‘उपनिर्वाचनमा आवेग र उत्तेजनाको राजनीति पनि मैदानमा देखियो। गलत र भ्रमपूर्ण सूचनाहरूको बलमा मन र मत जित्न सकिने भ्रम आम रूपमा परास्त भएको छ। निराशालाई मतमा बदल्न खोज्ने प्रवृत्तिसँग सजग रहँदै काम मार्फत विश्वास जगाउन र सामाजिक सञ्जाल मार्फतका भ्रमहरू चिर्न पार्टी पंतिको विशेष सतर्कता र क्रियाशीलता जरुरी देखिएको छ। यो उपनिर्वाचनमा सामाजिक सञ्जाल मार्फत सक्रिय भूमिका निभाउने युवा पंतिलाई पार्टी सम्मान गर्दछ’ विज्ञप्तिमा भनिएको छ।
चुनावी दौड सकिएकाले अब सबै तितानमिठा भुलेर काममा जुट्न समेत शर्माले आग्रह गरेका छन्।
