काठमाडौँ । काठमाडौँ महानगरपालिकाका प्रमुख बालेन शाहले बिहीबार काठमाडौँ महानगर वडा ८ को प्रशासनिक भवन समुद्घाटन कार्यक्रममा बोल्दै आफू धेरै बोल्ने भन्दा पनि काम गर्ने बताएका छन् ।
मेयर शाहले सबैले भाषण भन्दा पनि काम गर्न जरुरी रहेको र लामो सम्बोधन र भाषण गरेर समय लिने भन्दा पनि काममा समय दिनुपर्ने बताए । भवन उद्घाटनमा ठुलो कार्यक्रम गरिरहनु नपर्ने र २२ वर्षको मेहनतले सम्पदा शैलीमा वडा भवन बनाएकाले आकर्षक देखिएको समेत बताएका छन् ।
उनले विशेषगरी पशुपति क्षेत्र आफैँमा सम्पदा क्षेत्र भएकाले वडा भवनको मुहार जस्तै सम्पदामैत्री सडक र घरहरूको मुहार हेर्ने चाहना रहेको र काठमाडौँ महानगरले बजेट समेत व्यवस्था गरिरहेको बताएका छन् । उनले सम्पदा शैलीका सडक र घर भवनहरू भए पर्यटकहरूलाई आकर्षण अझै बढी हुने बताए ।