काठमाडौं — प्रधानमन्त्री केपी शर्मा ओलीले आफ्नो दुईवटा नागरिकता भएको भन्ने आरोप अस्वीकार गरेका छन्।
शनिबार श्रीमति राधिका शाक्यको आत्मकथा ‘करुणा’को लोकार्पण गर्दै उनले दुईवटा नागरिकता छ भन्दै प्रचार गर्नेहरूलाई जवाफ दिएका हुन्। उनले भूमिगत कालमा नागरिकता बोकेर हिँड्दा जोखिम हुने भएकोले फ्याँकेर हिनेको बताए।
उनले भने, ‘अस्ति मैले हेर्दै थिए केपी ओलीका दुईवटा नागरिकता, एउटा हरायो, म भूमिगत जाने बेलामा भागेर हिँड्ने बेलामा भएका प्रमाण नष्ट गर्ने बेलामा नागरिकता च्यापेर हिँड्छु त खल्तीमा? आफू को हुँ भन्नेकुरा लुकाएर हिँड्नुपर्ने बेलामा, केही नभएपनि मास्क लगाउनुपर्ने बेलामा, नागरिकता खल्तीमा हालेर हिँड्छ?’
त्यस्तै उनले पछि फ्याँकेको नागरिकता खोज्दा नभेटिएपछि अर्को बनाएको बताए।
‘नागरिकता फ्यालेर हिँडेको हो। पछि गएर खोज्दा भेटिएन। अनि अर्को बनाउनु परेन? अनि दुईटा भएन? के व्यहोरा फरक पर्यो? व्यहोरा फरक परेको छैन, पर्न पनि हुँदैन,’ उनले भने, ‘मैले बाबुको नाम फरक पार्न सक्दिनँ, आमाको नाम अर्को राख्न सक्दिनँ। भूमिगत कालमा आफ्नो नाम फरकफरक पार्न परेको छ परिचय लुकाउनको लागि, तर मेरो बुबाको नाम अर्को भन्न सक्दिनँ।’
